Halos 60 pushers nadakpan, masobra 7-K na-tokhang sa Reg. 6 sa Oplan Tokhang Reloaded

ILOILO CITY – Nagalab-ot sa 59 ka mga personalidad ang nadakpan sa bug-os nga Western Visayas sa sulod sang isa ka bulan matapos liwat ginlunsyar ang Oplan Tokhang.
Sa interview sang Bombo Radyo Iloilo, ginpahayag ni Police Regional Office 6 (PRO-6), pinakamadamo sa mga nagkaladakpan ang nagikan sa siyudad sang Iloilo nga nagalab-ot sa 24; 22 sa probinsiya sang Iloilo, 6 sa Antique, 5 sa Capiz kag duha sa Aklan.
Zero naman ang Guimaras nga antes ginlunsyar liwat ang Oplan Tokhang, nadeklarar na ang probinsiya nga drug cleared.
Sa ginpatigayon nga mga operasyon, isa naman ang napatay matapos nga nagbato sa mga otoridad ang subject sang buy bust operation sa Caluya, Antique.
Santo sa data sang PRO-6, nagalab-ot naman sa 7,454 ka mga pamalay ang na-tokhang na sang mga otoridad sa Western Visayas.
Sa probinsiya sang Iloilo, 2,761 na ka mga pamalay ang nabisitahan sang kapulisan; 2,309 sa Capiz; 515 sa siyudad sang Iloilo; 1,022 sa Antique; 765 sa Aklan kag 82 sa Guimaras.