ILOILO CITY – Nagdangat sa 1,771 nga pamilya ukon 6,523 nga indibidwal ang naapektuhan sang Bagyong Betty sa Western Visayas.
Sa interview sang Bombo Radyo kay Ms. Cindy Ferrer, spokesperson sang Office of the Civil Defense Region 6, iya ginpahayag nga base ini sa pinakaulihi nga data sang Regional Disaster Risk Reduction and Management Council.
Suno kay Ferrer, naghalin ang mga apektado nga residente sa 19 ka mga barangay sa Antique, kag 19 ka mga barangay sa Negros Occidental.
Nagdangat naman sa 4,010 nga mga indibidwal ukon 1, 229 nga pamilya ang nagpatuman sang pre-emptive evacuation.
Sa nasambit nga bilang, 3, 659 ng mga indibidwal ang nagikan sa Negros Occidental, 255 sa Antique kag 96 sa Capiz.
Samtang, ang iban pa nga apektado nga residente ang temporaryo nga nagtinir sa ila mga himata.
Apekatado man ang operasyon sang 25 ka mga pantalanan sa rehiyon kun sa diin, anum diri sa Antique, pito sa Iloilo, lima sa Negros Occidental, duha sa Guimaras kag lima sa Capiz.
Samtang, anum ka mga balay ang naguba sa rehiyon nga ginalakipan sang apat sa Antique kag duha sa Negros Occidental.
Nagdangat naman sa 649, 751 nga mga family food packs ang nahatag na sa mga apektado sang bagyo sa rehiyon partikular na sa Negros Occidental.
Padayon naman nga gina-verify sang opisina kun konektado sa Bagyo Betty ang napatay sang kilat sa probinsya sang Aklan.
