Nagdangat lamang sa P586,653 ang balor sang kontrobersyal nga waiting shed sa Barangay Katilingban, Molo, Iloilo City sandig sa pag-evaluate sang Iloilo City Engineer’s Office (CEO).
Ini ang mas manubo sang P211,872 ipaanggid sa original nga contract cost sini nga P798,525.
Ginpakigbahin sang opisina subong nga adlaw, Oktubre 24, ang mga detalye kaangay sang original contract kag revised cost sang na-evaluate na sang Agusto.
Sa original contract, ang may pinakadaku nga unit cost amo ang para sa steelworks nga nagalab-ot sa P322,747, apang nahimo nga P300,861 sa revised cost matapos ma-evaluate. Ang tatlo ka solar floodlight naman nagadangat sa P27,805, apang nagnubo sa P11,552 sa revised cost.
Yari ang kabug-usan nga scope of works kag balor sini sa original nga contract price:
I. General Requirements
IA. Construction of Temporary Facilities- P65,270.00
IB. Provision of Safety, Health Personnel and Accessories- P43,469.82
II. Project layout and clearing works- P16,624.32
III. Foundation excavation works- P9,398.90
IV. Backfilling ang compaction- P9,398.90
V. Reinforced concrete works (footing, column, footing tie beam, concrete stopper)- P67,077.17
VI. Paver blocks- P88,310.24
VII. Steelworks- P322,747.10
VIII. Roof and roof framing- P148,424.00
IX. Solar floodlight- P27,805.02
Yari naman ang revised cost/evaluated:
I. General Requirements
IA. Construction of Temporary Facilities- P22,298.06
IB. Provision of Safety, Health Personnel and Accessories- P28,655.55
II. Project layout and clearing works- P8,032.50
III. Foundation excavation works- P13,802.25
IV. Backfilling ang compaction- P5,197.50
V. Reinforced concrete works (footing, column, footing tie beam, concrete stopper)- P100,759.47
VI. Paver blocks- P42,469.65
VII. Steelworks- P300,861.80
VIII. Roof and roof framing- P53,024.34
IX. Solar floodlight- P11,552.24
Matandaan nga nagmandu si Mayor Raisa Treñas sang full review ukon pagrepaso sa amo nga proyekto sa tunga sang pagkwestyon sang mga pumuluyo kun ngaa halos P800,000 gid ang balor sang waiting shed.
Una na nga ginpahayag ni Mayor Treñas nga ginahulat sang iya nga opisina ang detalyado nga technical report halin sa CEO antes maghimo sang anuman nga konklusyon.
Sa interview naman sang Bombo Radyo kay Engineer Dianaline Señoron, head sang Iloilo CEO, iya ginpahayag nga wala pa nakapa-guwa sang kuwarta ang Iloilo City Government bangud nga wala pa na-turnover sang kontraktor ang amo nga waiting shed project.
Pahayag sini, may yara sang evaluation nga ginahimo agud masigurado nga may transparency ang proyekto kag mapasiguro nga indi mauyang ang pondo sang gobyerno.
Nahibaluan nga ginpa-review man sang alkalde ang isa pa ka kontrobersyal nga proyekto nga P4.1-million nga San Rafael Overpass Improvement Project sa Mandurriao district, apang wala pa napaguwa sang CEO ang report sa evaluation. Ang amo nga project ang gin-implementar man sang CEO.#
