Nagdangat sa 95% sang rice retailers sa pungsod suno sa Department of Agriculture (DA) ang naga-comply sa ginmandu ni President Ferdinand Marcos Jr. nga price ceiling sa bugas.
Suno kay Agriculture Director for Legal Services Willie Ann Angsiy, nagapadayon ang ahensya sa pagpalapta sang impormasyon sa non-compliant nga rice retailers.
Ini agud mapahibalo man sa ila nga may subsidiya nga ihatag bilang kumpensasyon sa ila nga mapierde nga income bangud sa price cap.
Pasalig sini, ihatag gid ang ayuda sa kondisyon nga naga-comply lang sa price ceiling nga P41 per kilogram para sa regular-milled rice kag P45 per kilogram para sa well-milled rice.
Una na nga ginpahayag sang Department of Social Welfare and Development (DSWD) nga makabaton ang rice retailers sang tubtub sa P15,000 nga subsidiya.
Ginpahayag man sini nga nagapakig-angot ang ahensya sa pribado nga sektor agud masigurado ang suplay tubtub sa pagsugod sang tag-alani sa Oktubre. #
