Nagpanindugan ang Hamas nga indi sini pag-ibalik ang nabilin nga mga bihag nga yara sa Gaza tubtub nga indi pag-untaton sang Israel ang gyera kag tubtub nga indi mag-isol ang ila nga mga soldado.
Kabahin ini sang statement sang head sang militant group sa Gaza nga si Khalil Hayya kadungan sang ila kumpirmasyon nga matuod nga napatay ang ila lider nga si Yahya Sinwar bangud sa pag-atake sang Israel Defense Forces.
Suno kay Hayya, maisog ang ila 62-anyos nga lider, naga-uyat sang iya armas, kag nagbato tubtub sa katapusan niya nga ginhawa.
Ginsiling sini nga ang pagka-martir sini kag ang iban pa nila nga mga lider amo pa gid ang nagapa-ibwal sang kabakod sang Hamas sa ila nga movement.
Wala sang statement nga maga-untat na sila sa ila hulag; sa baylo, gin-insister sang Hamas nga magapadayon sila sa pag-establisar sang Palestinian state sa duta sang mga Palestinian kag himuon nga kapital ang Jerusalem.
Nahibaluan nga gin-release man sang Israeli military ang video kun sa diin ulihi nga nakit-an nga buhi si Sinwar.
Sa sini nga video, nakit-an si Sinwar nga nagapungko sa sulod sang isa ka guba nga apartment kasunod sang iya engkwentro batok sa mga soldado.
Sang nakit-an sini nga nagapalapit ang military drone sa iya nahamtangam, ginhaboy pa niya ini sang kahoy.
Sunod nga ginpasigabong sang military ang building, nag-collapse, kag amo ini ang ginkamatay ni Sinwar.
Nakit-an ang iya bangkay nga may bulletproof vest, may mga granada, kag may 40,000 shekels ($10,707).
Si Sinwar amo ang ginatudlo nga main architect sang nag-atake ang Hamas sa Israel sang Oktubre 7, 2023 kun sa diin patay ang 1,200 ka mga tawo kag ginbihag ang masobra 250 kag ginabanta 100 ang wala pa gihapon nahilway.
Sang amo man nga tion, ginpangpatay ang mga tawo sa music festival, ginkomiter ang sexual violence, kag ginpang-igu man pati ang base-militar sang amo nga Jewish state.
Sa pagtimalos sang Israel, masobra 42,000 ang patay sa Gaza kag nagapadayon pa ang gyera tubtub subong.#
