Pangpatyon ang mga katapo sang militante nga Hamas kun magapadayon sila sa pagpangpatay sa mga tawo sa Gaza.
Ini ang pinakaulihi nga paandam ni United States President Donald Trump.
Kasunod ini sang naglapta nga videos nga ginapangtiro sang Hamas ang mga Palestinian nga mga sibilyan kasunod sang ila ceasefire sa Israel.
Matandaan nga ang Hamas mismo ang nagsapubliko sang video kun sa diin makit-an nga nagatindog ang armado nga mga lalaki sa atubang sang walo ka nakaluhod nga mga tawo nga may tabon sa mata.
Ginpangtiro ang walo sa atubang man mismo sang iban nga mga tawo bangud suno sa Hamas, silot ini bangud nagalapas sila sa mga layi sa Gaza.
Una na nga nagsiling si Trump nga wala man siya nahangawa sa amo nga krimen, bangud para sa iya, ginapangpatay ang mga “gang members.”
Apang sa latest statement sini, ginsiling sini nga kun magpadayon ang Hamas sa pagpangpatay, wala sang mahimo ang US kundi patyon man ang amo nga militante nga grupo.
Wala sini ginklaro kun sin-o ang maga-intra kag magapatay sa militante, pero sang tinalikdan nga Myerkules, ginsiling sini nga indi na kinahanglan nga manghilabot pa ang US military sa sitwasyon sa Gaza.
Matandaan nga may partial withdrawal sang pwersa sang Israel sa Gaza kasunod sang 20-point ceasefire plan nga napatigayon paagi sa Estados Unidos sang Amerika.
Kasunod sadto, ang top US commander sa Middle East nga si Admiral Brad Cooper ang nag-demand sa Hamas nga untaton ang pagpangpatay sa mga Palestino nga sibilyan kag magsunod na lamang sa kun ano ang plano ni Trump.
