ILOILO CITY – Hampanganan nga helicopter kag bato sa baylo nga drone ang unod sang parcel nga nabaton ni Punong Barangay Reyland Hervias sang Compania Central, Molo, Iloilo City gikan sa isa ka online seller.
Sa interview sang Bombo Radyo kay Hervias, iya ginpahayag nga nagbakal siya sang drone online agud kun tani gamiton para sa ila barangay apang hampanganan kag bato ang iya nabaton.
Suno kay Hervias, may yara na siya sang pagduda rason nga ginpahulat niya ang delivery man kag ginkuhaan sang video ang pagbukas sang nabaton nga parcel.
Ginpahayag ni Hervias nga samtang ginabuksan ang box, nakita niya sa sulod ang box sang hampanganan nga helicopter kag nakaputos naman sa bubble wrap ang bato.
Nagpanugyan naman ang delivery man suno kay Hervias nga ibalik sa online seller ang parcel bangud maathag nga scam ang natabo.
Nagpaandam ang Punong Barangay sa mga mahilig sa online shopping nga lantawon anay ang unod sang parcel antes ihatag ang bayad sa naga-deliver.
