Ginahanda na sang mga otoridad ang mga kaso nga ipasaka sa driver sang ceres bus nga naaksidente sa Brgy. Igbucagay Hamtic Antique .
Sa interview sang Bombo Radyo kay Police Major Rodolfo Pagharion, hepe sang Hamtic Municipal Police Station, iya ginpahayag nga igapasaka nila ang kaso sa tion nga wala sang matabo nga areglohanay sa tunga sang Vallacar Transit Incorporated kag sang pamilya sang mga biktima.
Suno kay Pagharion, mahimo magpangatubang ang driver sang kaso nga reckless imprudence resulting to physical injuries kag reckless imprudence resulting to homicide sa driver.
Pahayag pa sang hepe, human error ang ginatan-aw nila nga rason sa nagluntad nga pagkahulog sang ceres bus sa pil-as.
Gindugang pa sang natungdan nga wala man nagsobra sa gintalana nga 80kph ang pagpadalagan sang driver sa nasambit nga bus.
Ginapadalman pa nila suno kay Pagharion ang mechanical nga aspeto agud mas mangin tul-id ang imbestigasyon.
Samtang gin-athag man sang hepe nga nahitso na ang ila miscommunication sa tunga sang technical personnel sang Vallacar Transit Incorporated may kaangtanan sa pagkuha sang mga bahin sang ceres bus sa accident site.
Suno pa kay Pagari-on naresolbar na ang isyu kag natapos na nila ang imbestigasyon sa chassis (CHasē) kag sa engine sang salakyan kag nagmatch man ini sa registration.
