𝗜𝗟𝗢𝗜𝗟𝗢 — Masugod na buwas nga adlaw ang una nga hamyang ni Nielette ‘Tweety’ Tupas- Balleza ang unica hija ni Former Governor Niel Tupas Sr., sa ila nga puluy-an sa MV Hechanova Subdivision, Jaro, Iloilo City.
Sa interview sang Bombo Radyo kay Lex Tupas, former Iloilo City Councilor, iya ginpahayag nga wala sila nag-ekspektar nga magataliwan ang iya utod bangud makitaan niya sang senyales nga maayo na ini.
Suno kay Tupas, nagsuprer sang stroke ang iya utod, rason nga ginpaidalom ini sa brain surgery bangud may nakita nga mga blood clot sa iya nga utok, sa diin, naglawig ang operasyon sang 5 ka oras.
Ginpahayag man sini nga dako ang iya nga paglaum nga mangin maayo ang iya utod matapos nga sang Sabado, Hunyo 15, 2024, ginkakas ang mga aparatos bangud nakita nga nagmayo na ang kondisyon sini.
Plano pa kuntani sang ila nga pamilya nga mag family bonding sang nagligad nga fathers day, apang masubo nga nagtaliwan sa amo nga adlaw si Tweety.
Ginlaragway naman ni Former Councilor Tupas ang iya nga utod bilang isa ka maisog nga babahi, utod, asawa, kag anak sa ila nga pamilya.
Nagapati naman ini nga madamo sang legasiya ang nabilin ang iya pinalangga nga utod samtang ini ang nagakabuhi pa sa ibabaw sang kalibutan.
Nagpasalamat naman ini sa tanan nga nagbulig kag nagpahayag sang ila nga kasubo sa ila nga nabatyagan nga kalisod sa pagtaliwan sang iya nga utod.
