ILOILO CITY – Nadakpan sang otoridad sa bulig sang mga tricycle driver ang hangkilan nga kawatan sang cellphone sa Jaro, Iloilo City.
Tatlo ka cellphone ang nakuha gikan sa suspek nga si Rosa May Jopson, 38, pamilyado sang Brgy. Bakhaw, Mandurriao, Iloilo City.
Sa interview sang Bombo Radyo kay Police Captain Eduardo Siacon, hepe sang Jaro Police Station, iya ginpahayag nga modus sang suspek ang pagpanguot sang bag ilabi na sa mga pasahero nga manugsaka sa jeep.
Suno kay Siacon, ginatabu sang suspek nga magutok agud nga indi gilayon madakpan.
Ginpahayag ni Siacon nga ASUS nga cellphone ang ginkawat sang suspek gikan sa babayi nga biktima apang sang gin-usisa ang iya bag, nakuha ang dugang nga duha ka cellphone.
Sang damlag lang, napreso man ang suspek bangud sa pagpangawat apang wala lang napasakaan sang kaso bangud wala sang complainant.
Sa subong, ginpahayag sang hepe nga desidido nga magpasaka sang kaso ang biktima.
Nagpamalibad naman ang suspek nga maghatag sang pahayag.
