ILOILO CITY – Arestado ang isa ka ginapahayag scammer matapos nadakpan sa Barangay PHHC Blk 22, Mandurriao, Iloilo City.
Ini amo si Ana Mallorca Pedrajas, 49, residente sang Barangay Poblacion South, Oton, Iloilo.
Sa interview sang Bombo Radyo kay Police Captain Val Cambel, Officer-In-Charge sang Mandurriao Police Station, iya ginpahayag nga nadakpan si Pedrajas matapos nagpangawat sang wallet sang iya landlord.
Sang gin-aresto, natukiban nga may yara ini sang warrant of arrest bangud sa pagpang-scam.
Suno kay Cambel, sang gin-aresto ini, nakuhaan ini sang madamo nga mga identification document (ID) kag may nagkalain-lain nga mga address.
Sang ginbukad ang iya rekord pinaago sa social media patrolling, natukiban nga siya ang ginapangita nga scammer sa diin daw kaangay nga ginapang hypnotize sini ang iya mga biktima.
Ang iya ginahimo amo ang pagpang-recruit sang mga luyag magtrabaho sa airport bilang checker ukon encoder.
Diri kag pangayuan na sini sang kwarta ang iya mga biktima para sa medical kag mapadasig ang pagproseso sang ila papeles.
Matapos makuha ang kwarta, indi na ini ma-contact.
Magluwas diri, nagapakilala man ini nga broker kay may amo nga Chinese.
Kaangot sini, nagpanawagan naman si Cambel sa mga nabiktima sini mga magdangop sa Mandurriao Police Station.
