Nagapanindugan ang Malacañang nga indi pa makabig nga “armado nga pagpang-atake” ang ginhimo sang China sa mga sakayan sang Pilipinas sa rotation and resupply mission sa Ayungin Shoal sang Hunyo 17 kun sa diin isa ka Navy personnel ang nautdan sang tudlo.
Ginpahayag ini ni Executive Secretary Lucas Bersamin sa isa ka press conference matapos nga nag-convene ang National Maritime Council kag nag-desisyon nga irekomendar kay President Bongbong Marcos nga ang masunod nga rotation and resupply missions sa BRP Sierra Madre sa Ayungin Shoal ang dapat nga isapubliko na para nga wala sang rason ang Beijing nga balabagan ang mga sakayan sang Pilipinas.
Suno kay Bersamin, posible nga “indi-paghangpanay” ukon aksidente lamang ang natabo sang Lunes.
Ginpahayag ni Bersamin nga sa videos sang military, binangon kag wasay ang ila nakit-an nga gingamit sang China Coast Guard kag wala na sang iban pa.
”No, well this was probably a misunderstanding or accident, we are not yet ready to classify this as an armed attack. I don’t know kung ‘yung mga nakita namin is mga bolo, ax, nothing beyond that,” suno kay Bersamin.
Ginalantaw man sini nga ang posible rason kun ngaa nangin agresibo ang China Coast Guard sang Hunyo 17 amo nga wala sila sang ihibalo nga maga-resupply ang Pilipinas.
Pahayag pa ni Bersamin, nagapabilin nga bukas ang Pilipinas nga makig-istorya sa China agud mapahagan-hagan ang tension sa West Philippine Sea.
“But reaching out is always a means to look at the situation, to resolve any pending issues or concern,” pahayag sini.
Wala man ginakonsiderar suno sa iya nga ipasaka ang isyu sa mas mataas nga international body bangud mahimo kag mahapos man ini maresolba kun magbuligay ang China kag Pilipinas.
Matandaan nga sa insidente sang nagligad nga Lunes, ang ginpanggamit sang Chinese Coast Guard personnel amo ang kutsilyo kag wasay, kag ginhanaan pa sang sticks ang mga soldado nga Pinoy samtang ginasulit-sulit nga ginabungguan ang mga sakayan sang Pilipinas.
Gingisian pa rason nga nagkupos ang isa ka inflatable boat sang Pilipinas samtang ginguba man ang pila ka mga equipment lakip na ang navigational screen.
Sang ulihi, ila na gid ginsakaan ang Philippine Navy rubber boats kag ginkawat ang duha ka Philippine boats kag M4 rifles nga kuntani dal-on sa tropa nga yara sa BRP Sierra Madre sa Ayungin Shoal.
