Ginhabuyan sang lunang kag ginsinggitan sang akig nga mga tawo ang hari kag reyna sang Espanya kadungan sang ila pagbisita sa Paiporta sa Valencia region nga isa sa pinakaapektado sang lapnagon nga baha sang nagligad nga semana.
Mabatian ang mga tawo nga nagasinggit sang “murderer” kay King Felipe VI amo man kanday Prime Minister Pedro Sanchez kag regional governor Carlos Mazon.
Makit-an sa videos kag pictures nga ginprotektahan lamang sang security guards ang hari gamit ang ila dala nga payong samtang ang iban naman nga police officers ang nagasakay na sa kabayo kag nakaalerto samtang may gina-uyatan na ang iban nga mga residente nga pala kag tubo.
Nakit-an man pati si Queen Letizia nga may mga lunang man sa iya nga nawong kag bayo kag ginpalapitan pa ini kag ginkumpronta sang akig mga residente.
Apisar sang insidente, makit-an nga nagpabilin nga kalmado ang royals samtang nagapamati sa atubang sang mga residente.
Makit-an nga binudlayan naman ang mga pulis nga makontrol ang pagdinaguso sang mga tawo.
Kasunod sang amo nga hitabo, ginsuspinde na ang pagpadulong sang hari kag rayna sa Chiva nga isa man ka lugar nga nabahaan sa amo nga rehiyon.
Gin-evacuate naman ang prime minister halin sa Paiporta bangud sa kahangawa sa seguridad sini.
Nag-ugat ang kaakig sang mga tawo sa ginaalegar nga ulihi na katama nga text warnings sa ila kaangot sa baha kag sa atrasado kag kulang nga responde sang Spanish government sa mga biktima sang kalamidad.
Nagsaka na sa masobra 210 ang patay sa amo nga baha sa Valencia, Castilla La Mancha kag Andalusia, kag ginakahangaw-an nga magtaas pa ang death toll bangud sa indi pa matumod nga numero sang missing nga mga tawo.
Sa sini lang nga mga inoras, may yara naman sang red weather alert nga gin-isyu sa mga parte sang southern Valencia nga naga-cover sa syudad sang Alzira, Cullera kag Gandia.
