Nagdangat na sa $540 million ukon P30.38-billion ang natipon sang kampo ni Vice President Kamala Harris halin sang ginsuguran na sini ang kampanya batok kay anay President Donald Trump para sa pagka-presidente sang Estados Unidos sang Amerika.
Sandig sa memo nga gin-release sang campaign manager ni Harris nga si Jen O’Malley Dillon, ginpahayag nga nalakip sa sini nga kantidad ang $82 million ukon P4.61-billion nga halin sa Democratic National Convention sang nagligad nga semana.
Ginpahayag sang manager nga ini ang pinakadaku nga natipon sang presidential campaign sa sini lang nga time span.
Hulyo 21 sang nangin presumptive nominee si Harris sang Democratic Party matapos nag-atras sa reelection bid si President Joe Biden kag naghatag sang iya endorsement sa bise-presidente nga amo ang mangin standard bearer sang ila partido batok sa Republicans.
Apisar ulihi na na-anunsyo ang kandidatura ni Harris, nakakuha ini sang momentum kag nakita sang analysts nga nabudlayan ang kampo sang Republican leader nga mapabilin ang media spotlight sa ila bahin.
Magluwas sa ginapabugal nga kontribusyon sa kuwarta, ginpahayag man sang Harris campaign nga nagatimbuok subong ang volunteer support para sa bise-presidente, kun sa diin sa convention week pa lamang, malapit 2,000 ka volunteers ang nagpirma para sa kampanya sini para sa November elections.#
