Ilakip na si anay presidential spokesperson Harry Roque sa mga indibidwal nga imbestigaran sang Presidential Anti-Organized Crime Commission (PAOCC).
Kaangot ini sa duha ka foreigners nga nadakpan sa isa ka balay sa Tuba, Benguet kasunod sang raid sang otoridad bangud sa ginpahayag nga koneksyon sa illegal Philippine offshore gaming operators (POGO).
Si Usec. Gilbert Cruz amo ang nagkumpirma nga imbestigaran nila si Roque apisar pa nga ginpanginwala sini nga siya ang tag-iya sang balay, apang nag-ako nga may interes siya sa korporasyon nga nagapanag-iya sini.
Una na nga ginpaathag ni Roque sa atubang sang Senado nga nag-istar siya matuod sa amo nga balay sang naghalin na siya sa trabaho sa gobyerno, apang as of January 2024 suno sa natungdan, ginpa-arkilahan ini sang korporasyon sa isa ka Chinese national nga nagahingalan kay Wan Yun.
Sang gin-require ini nga magpirma sang contract of lease suno pa kay Roque, gin-require ini nga magpakita sang alien certificate of registration kag nagaguwa nga ini nga Chinese national ang holder sang 9G working visa nga buot silingon may kinamatarong ini nga magtinir sa Pilipinas.
Nahibaluan nga sa amo nga law enforcement operation sa Tuba ang tuyo kuntani amo nga arestuhon ang Chinese woman nga na-link sa Pogo hub sa Bamban, Tarlac.
Wala nadakpan ang amo nga babaye, apang natigayon nga naaresto sang government agents ang Chinese national nga si Wang Keping, 35, kag ang iya Cambodian nga kaupod nga si Khuon Moeurn, 37.
Sang ulihi, ginklaro ni Senator Risa Hontiveros nga indi Cambodian national ang naaresto sa amo nga balay kundi isa ka pugante nga Chinese. Peke suno sa senadora ang Cambodian passport nga gina-uyatan sang lalaki, kag base sa impormasyon, isa ini ka red notice fugitive, “very” high-level, kag nakapanunto na sa 100,000 ka mga tawo.
