Nanindugan si anay presidential spokesman Harry Roque nga wala siya sang plano nga magpauli sa Pilipinas magluwas lang kun i-mandu na sang Korte Suprema.
Sang nagligad nga adlaw, ginpasa sini ang iya counter-affidavit nga nanotaryuhan sa Abu Dhabi kaangot sa qualified human trafficking complaint nga ginpasaka batok sa iya bangud sa iya ginaalegar nga kaangtanan sa Philippine offshore gaming operator (POGO) hub sa Porac, Pampanga.
Kahapon, Disyembre 4, naghatag sang kumpirmasyon ang Department of Foreign Affairs (DFA) nga si Roque kag ang iya asawa ang nagpakita sa Philippine embassy sa Abu Dhabi para sa notarial services.
Suno kay Roque, kinamatarong sini nga magbyahe bangud wala man sang ginpaguwa nga hold-departure order (HDO) batok sa iya. Ang pagbiya sa Pilipinas suno sa iya ang indi makabig nga ebidensya nga guilty siya bangud ang korte lamang ang naga-isyu sang arrest warrant.
“Leaving the country is not proof of any as they claimed that flight is evidence of guilt as the court only issues the arrest warrant,” suno sa iya. “For 40 years, I’ve defended the rights of others. It is only right that I reiterate my right as a person.”
Nagpahayag man ini nga magakooperar lamang siya sa imbestigasyon sang House quad committee kun magahatag sang mandu ang Supreme Court nga mag-comply siya sa pagpasa sang mga dokumento.
Sa pihak nga bahin, ginsiling sini nga handa siya magkooperar sa imbestigasyon sang Department of Justice (DOJ) kun magpamangkot ang prosecutors sang dugang nga mga impormasyon kaangot sa iya nga counter-affidavit.
Nahibaluan nga ang kaso nga ginakaulamiran ni Roque amo man ang gin-file batok kay Cassandra Li Ong kag pila ka iban pa nga ginatudlo may kaangtanan sa Lucky South 99 Corp.
Sa quad comm naman sa Kamara, may arrest order para sa iya matapos gin-cite for contempt kag ginmandu nga i-detain bangud wala ini nagpasa sang mga dokumento nga amo kuntani ang maga-justify sang gulpyada nga pagdamo sang iya manggad.#
