Naghabiya na sa The Hague, Netherlands si anay presidential spokesperson Harry Roque samtang nagkatalana nga sugoran ang iya proseso sa asylum.
Suno kay Roque, ginahulat niya ang iya una nga interview sa syudad nga masobra apat ka oras ang kalayuon halin sa The Hague.
Nagsiling siya nga pagkatapos sang una nga interview, hilway na siya nga magbalik sa The Hague.
Ginpaathag niya nga ang proseso sang asylum may pila ka mga tikang, lakip ang inisyal nga pagparehistro, fingerprinting, interview sa pulis, medical examination, kag una nga interview.
Pagkatapos sini, mahimo na siya maghalin kag maghulat na lang sang abiso para sa katapusan nga interview.
Ginpanindugan man ni Roque nga bilang isa ka asylum seeker, may yara siya sang kinamatarung sa nonrefoulement ukon proteksyon batok sa deportation pabalik sa Pilipinas nga iya gintawag nga pungsod nga nagapamulitika sa iya.
Ginpahayag sini nga indi na siya mapabalik sa Pilipinas bangud sa political persecution.
Samtang, ginklaro man sini nga wala siya gin-detain kag hilway na nga makahulag.
Madumduman nga nagbiya sa pungsod si Roque matapos gin-issue sang Kongreso sang arrest warrant may kaangtanan sa ginaalegar kahilabtanan sini sa iligal nga operasyon sang Philippine Offshore Gaming Operators (POGO) sa pungsod.
Nagpanawagan man ini sa publiko nga magmartsa sa EDSA agud suportahan si anay Presidente Rodrigo Duterte.
Apang sa baylo nga magsuporta, daw baliskad ini kag madamo ang nagyaguta sa iya online, nga nagasiling nga dapat magbalik na lang siya sa Pilipinas kag pangunahan ang ginaduso nga protesta.
