Nahilway na si anay presidential spokesperson Harry Roque matapos isa ka adlaw man nga nagpanimuron sa detention cell sang Kamara.
Ginkumpirma ni House Secretary General Reginald Velasco ang pag-release kay Roque paagi sa pag-cite kay House Sergeant-at-Arms Napoleon Taas.
Huwebes sang gab-i sang gin-detain si Roque matapos nga gin-cite in contempt sang mga mamalidha bangud sa iya nga pagbinutig sa iya rason kun ngaa wala siya nakatambong sa hearing sang nagligad nga Agusto 16.
Sang Agusto 13, nagsulat si Roque sa House Committee on Dangerous Drugs nga indi siya makatambong bilang resource person sang joint committee hearing sa Agusto 16 bangud may court hearing siya sa amo man nga adlaw sa Regional Trial Court sa Manila.
Nabuyagyag ugaling paagi sa certification nga nakuha sang Kamara halin sa Office of the Clerk of Court and Ex-Officio Sheriff sa korte sa Manila nga indi matuod nga may schedule sang court hearing si Roque sang Agusto 16.
Nahibaluan nga ang quad committee sang Kamara nga nagapatawag sa hearings amo ang nagabusisi sa pagduging sa offshore gambling sa pungsod kun sa diin imbitado ang former presidential spokesperson matapos nadalahig man ang iya pangalan nga nag-lobby para sa iligal nga POGO.
Sang gin-contempt sa Kamara, nag-post pa si Roque nga wala siya nagbutig kundi isa ka “honest mistake” ang natabo bangud nagpinsar siya nga sa Huwebes matupa ang hearing pareho sa nauna kag ikaduha nga hearings nga iya gintambungan.
Gintawag man sini nga abuso sa gahum, pagpang-ipit, kag isa ka political harassment ang pag-detain sa iya sa House of Representatives.
Ginsiling man sini nga ang duha ka rason sa iya detention amo nga pahipuson siya bilang kritiko sang administrasyon kag bilang kaalyado sang mga Duterte; kag ikaduha, agud nga punggan siya nga himuon ang iya trabaho bilang legal counsel ni former president Rodrigo Duterte sa International Criminal Court.
