Nagapati ang National Police Commission (NAPOLCOM) nga nagakadapat pahalinon sa serbisyo ang duha ka kontrobersyal nga police trainee nga nagpahubog sa Oton, Iloilo samtang ginapatuman sang probinsya ang liquor ban sa idalom sang Modified Enhanced Community Quarantine (MECQ) status.
Sa exclusive interview sang Bombo Radyo kay Atty. Joseph Celis, Director sang NAPOLCOM Region VI, iya ginpahayag nga nagakadapat nga ang mapahalin sa serbisyo ang mangin resulta sang termination process sang duha ka police trainee.
Suno kay Celis, nagakadapat man nga i-restrict anay ang duha ka pulis sa sulod sang Police Regional Office VI samtang wala pa natapos ang ila termination process.
Indi nagakaangay suno kay Celis para sa mga police personnel nga nagatraining pa lamang, nagapakita na sang indi maayo nga pagginawi kag pagpinamatasan.
Mahimo suno kay Celis nga liwat-liwaton sang mga police trainee ang pagdinungol kun i-tolerar pa ang mga ini kag hatagan sang tyansa nga magpabilin sa serbisyo.
Nahibaluan nga una na gin-ako sang police trainees nga nagpahubog sila samtang nakasuksok pa sang camouflage green nga PNP-Field Service Uniform.
