Nakalab-ot na sa talatapan sang Philippine Army Reserve Command ang ginreport nga hazing incident nga nagluntad sa Reserve Officers’ Training Corps (ROTC) sang University of Iloilo.
Sa interview sang Bombo Radyo kay Col. Michael Asuncion, Director sang 604th Community Defense Center (CDC), iya ginpahayag nga nagapadayon karon ang separado nga imbestigasyon sang opisina kag nakihabalo na si Major General Ronald Jess S. Alcudia nga Chief of Staff sang Philippine Army kun sa diin, ginpasiguro nga manabat ang personalidad sa likod sang nagakatabo nga hazing.
Gin-athag man sang natungdan nga may-ara na sang mga nauna nga insidente kun sa diin, na-terminate ang ginatudlo responsable sa hazing kag may ginpatigayon nga briefing, rason nga ang mga ginikanan sang complainant ang direkta nalang nga nag-report sa talatapan sang CDC kag bangud otorisado man si Col. Asuncion, gin-aktuhan ini sang opisina apisar nga wala na nag-agi kay Col Rolando Palomar nga Commandant sang University of Iloilo-ROTC.
Apisar pa suno sa natungdan kun iya ka unibersidad ukon iya ka ROTC nga aktibidad kun sa diin natabo ang hazing, importante sa gihapon nga maaktuhan bangud ROTC officers ang naulamid sa insidente.
Sa ika-duha nga semester, may patigayunon naman nga reorganization sang mga training officers, ini ang ginaubra nga tikang kun may nakita nga kapaltahan sa mga tinalikdan nga training sang ROTC.
