Nakalab-ot na sa talatapan sang Philippine Army Reserve Command ang ginreport nga hazing incident nga nagluntad sa Reserve Officers’ Training Corps (ROTC) sang University of Iloilo.
Sa interview sang Bombo Radyo kay Col. Michael Asuncion, Director sang 604th Community Defense Center (CDC), iya ginpahayag nga nagapadayon subong ang separado nga imbestigasyon sang ila opisina kag sang Philippine Army Reserve Command.
Nakalab-ot naman ang insidente kay Major General Ronald Jed Alcodia, Chief of Staff sang Philippine Army kag ginpasiguro sini nga pasabton ang mga responsable sa likod sang ginreport nga hazing.
Nahibaluan nga ang ROTC sang University of Iloilo yara sa direkta nga supervision sang 604th Community Defense Center (CDC), samtang ang mas mataas nga command amo ang Philippine Army Reserve Command nga may umbrella unit nga nakabase sa Cavite.
Suno sa pamunuan, may nauna na nga kaso sang hazing sa unibersidad kag na-terminate na ang mga responsable sadto nga insidente.
Samtang ginpahayag naman ni Col. Rolando Palomar, Commandant sang ROTC sang UI, nga importante gid nga maprotektahan ang mga kadete sini kag indi na maglab-ot sa malain nga buluhaton kaangay sang hazing.
Padayon pa ang imbestigasyon kag ginalauman nga magapatigayon sang reorganization ukon restructuring sang ROTC training officers kon may mapamatud-an nga may paglapas sa nasambit nga buluthuan agud matagaan sang hustisya kag disiplina ang mga tawo sa likod sini.
