Ginpahalin na sang Phoenix Suns ang 50-anyos nga coach sini nga si Frank Vogel.
Ini masobra isa ka semana matapos gin-sweep sang Minnesota Timberwolves ang Suns sa first round sang NBA playoffs.
“After a thoughtful review of the season, we concluded that we needed a different head coach for our team,” kabahin sang statement ni Suns general manager James Jones. “We appreciate Frank’s hard work and commitment.”
Sang nagligad nga summer sang gin-hire si Vogel kag naka-produce sa isa ka season sang 49-33 nga record. Balik na ini subong sa job market matapos ang 19 ka seasons sa NBA sidelines bilang assistant ukon head coach.
Sa nagligad nga 12 NBA seasons, nagpungko siya bilang head coach lakip na ang stints sini sa Los Angeles Lakers, Orlando Magic kag Indiana Pacers. Nangin coach siya sa Lakers sang nakuha ang NBA championship sang 2019-20 season.
Sa pihak nga bahin, pila ka oras matapos nagguwa ang reports nga ini, naggaguwa na nga frontrunner nga magbulos kay Vogel sa Phoenix si anay Milwaukee Bucks head coach Mike Budenholzer nga ginpahalin man anay sa Bucks matapos ang lima ka season sa amo nga prangkisa kag duha ka tuig matapos ginpangunahan sini ang team nga mabulsa ang ila ikaduha nga NBA title.#
