Wala nalab-ot sang Pharmally Pharmaceutical Corporation ang basic financial capacity requirement sang ini ang napilian nga hatagan sang award sang binilyon nga balor sang government contracts para makahatag sang COVID-19 supplies.
Sa natabo nga Senate hearing, gin-ako ni Pharmally president Huang Tzu Yen nga naghulam sila sang kwarta kay anay presidential adviser Michael Yang.
Suno kay Senate Minority Leader Franklin Drilon, matapos nga makuha sang Pharmally ang kontrata, gilayon sila nga nagpakig-angot sa Chinese businessman nga si Yang kag buot silingon, sang tion nga gin-award ang kontrata sa pharmaceutical company, wala ini sang pondo agud nga tungdan ang ila nga obligasyon.
Sa subong, gina-imbestigahan na sang Senate Blue Ribbon ang pagbakal sang P8.6 billion nga balor sang face masks, face shields kag PPEs sang Procurement Service of the Department of Budget and Management sa Pharmally Pharmaceutical Company.
Una na nga gin-deny ni Yang nga may yara siya sang kaangtanan sa Pharmally apang sa ulihe, gin-ako man niya nga siya ang nagpakig-angot sa mga suppliers.
Ginpahayag sang Pharmally official nga si Linconn Ong nga nagpasalig na si Yang sa ila samtang sila ang nagapangita sang PPE supplies sa China.
