OTON, ILOILO – Nakaangkon sang pilas sa abaga ang head security officer sang Iloilo Fish Port Complex matapos ginluthang sang riding-in-tandem suspects sa Barangay Buray, Oton, Iloilo.
Ang biktima amo si Erwin Jordan kag ginapahayag nga naka-drive pa siya padulong sa police station kag nakareport sa pulis angot sa insidente.
Sa interview sang Bombo Radyo kay Police Corporal Reymund Dollete, imbestigador sang Oton Municipal Police Station, iya ginpahayag nga sa Bakhaw, Mandurriao nagapauli si Jordan apang ginapahayag nga nagdul-ong lang ini sang iya co-worker sa Sta. Felomina Subdivision.
Sang pabalik na sa banwa sang Oton, naglabay ang riding-in-tandem suspects, gintiro ang biktima, kag gilayon nga nagpalagyo.
Wasak ang winshield sang salakyan ni Jordan.
Matandaan nga si Jordan amo ang isa sa tatlo ka persons of interest nga gintumod sang Molo Police Station kaangot sa kamatayon sang health and sanitation officer sang fish port nga si Glen Peremne sang Abril 23 sa San Juan, Molo, Iloilo City.
Suno naman kay Barangay Kagawad Wilfredo Talja sang Buray, Oton, isa lang ka lupok ang nabatian sang mga tawo sa lugar.
Wala na nagpanaug sa motorsiklo ang tawo nga nagtiro kay Jordan kag nagdiretso na palagyo.
Suno sa barangay kagawad, may yara sang closed circuit television (CCTV) camera sa lugar apang wala nakuhaan sang footage ang natabo.
