Ginmandu ni President Ferdinand “Bongbong” R. Marcos Jr. nga dapat may manabat gid kun mapamatud-an nga may kurapsyon sa retrofitting sang Cabagan – Santa Maria bridge, ang taytay sa Isabela nga bag-o lang nabuksan apang narumpag sang Huwebes.
Suno kay Presidential Communications Office (PCO) Undersecretary Claire Castro, ginpasuguran naman ang imbestigasyon sa amo nga insidente.
“Nagkausap kami ni Pangulo kahapon regarding this. Ito talaga ay papaimbestigahan, okay. Kung may bahid man ng korapsyon sa nangyaring ito mula pa noong 2014 hanggang sa ngayon kung mayroon man, hindi talaga puwedeng hindi managot,” suno kay Castro.
Suno pa sa undersecretary, bisan nga naglunsar na ang Department of Public Works and Highways (DPWH) sang imbestigasyon sa pag-collapse sang proyekto, indi ini makabig nga ordinaryo nga kaso kag dapat nga lantawon gid ang mga ebidensya.
“‘Pag nalaman natin kung sino ang mayroong pagkakamali dito at may bahid nga ng korapsyon, kung may bahid ng korapsyon ay dapat may managot,” dugang sini.
Ginsiling man sini nga dapat i-assess gid sang local government units ang kondisyon sang mga establisyemento kag imprastraktura bangud indi na ini trabaho sang presidente.
Nahibaluan nga base sa report sang DPWH-Cagayan Valley, sang Huwebes alas otso sang gab-i, narumpag ang third span sang Cabagan side sang taytay nga nagalaba sang 60 metros bangud nga naglabay ang truck nga may karga nga boulders nga may calculated approximate gross vehicle weight nga 102 tons.
Base naman sa Isabela Provincial Disaster Risk Reduction and Management Office, anum ka mga tawo lakip ang isa ka bata ang nasamaran bangud sa pagkarumpag sang proyekto.
Nag-umpisa ang construction sang taytay sang Nobyembre 2014, kag naka-schedule nga matapos sang 2019, apang ginpaidalom pa sa retrofitting, rason nga nakumpleto sadtong Pebrero 1, 2025.
Nagabalor ini sang P1.2 billion. (Photo Courtesy: MDRRMO Cabagan)
