Naghatag sang panugyan ang isa ka eskperto sa medisina may kaangtanan sa heat stroke nga madata subong nga tyempo sang tag-ilinit.
Sa interview sang Bombo Radyo kay Dr. Elvin Tiangha, iya ginpahayag nga ang heatstroke ang isa ka malala nga heat illness ukon medical emergency kun sa diin nagasobra sa 40 degree celcius ang temperatura sang lawas sang isa ka tawo.
Suno kay Tiangha, masami nga biktima sini ang mga bataon kag ang mga may edad na nga tuman ang pagpainit sa silak sang adlaw.
Ang heat stroke suno sa iya ang mahimo nga magtuga sang pagdileryo sang isa ka tawo, kidney failure kag multi organ failure nga mahimo tunaan sang kamatayon.
Magluwas sa kidney, mahimo man nga maapektuhan ang utok ang ang pagginhawa sang isa ka tawo.
Ang pagka obese ukon ang iban pa nga makabig chronic illness ang makahatag man sang risgo sa isa ka tawo nga ma-heat stroke.
Ang mga sintomas sini ang ginalakipan sang inis sang lawas, pagpalanuka, pagpalamula sang panit, dasig kag manabaw nga pagginhawa kag tuman ka grabeh nga pagsakit sang ulo.
Kun may yara naman sang biktima sang heat stroke sayluhon ini sa mahandong kag mabugnaw nga lugar, pagpayan, pahalugan ang ginasuksok nga panapton, ukon dal-on gilayon sa pinakamalapit nga hospital.
Agud makalikaw sa nasambit nga balatian sini nga tag-ilinit nagakadapat nga indi magbulad sa tuman ka init nga silak sang adlaw, indi maggamit sang tuman ka damol nga bayo kag nagakadapat nga mag-inom gid sang madamo nga tubig.
