Istrikto nga ginapatuman sang mga gin-deploy nga personnel sang Iloilo City Police Office (ICPO) ang minimum public health standards sa Iloilo City Comelec Office.
Nahibaluan nga nagpadayon umpisa subong nga adlaw ang voter registration sang Commission on Elections para sa 2022 national elections.
Sa interview sang Bombo Radyo kay Police Captain Shella Mae Sangrines, Spokesperson sang ICPO kag hepe sang Police Station 1, iya ginpahayag nga ginapatuman ang one entrance one exit sa Iloilo City Comelec kag ginagiyahan man ang mga tawo nagagwa kag nagasulod agud nga malikawan ang pagdinaguso.
Gin-ako man sang natungdan nga dako nga pagpanghangkat para sa ila ang pagpatuman sang physical distancing apang nagasunod man ang mga pumuluyo kun mahatagan sang nagakaigo nga instruction.
Nahibaluan nga bukas ang opisina sang Comelec sa syudad humalin Lunes tubtob Byernes las 8:00 sang aga tubtob las 5:00 sa hapon.
Bukas man ang nasambit nga opisina kun Sabado kag holiday.
Yari naman ang mga dapat dal- on kag sundon agud makaparehistro:
- Valid ID kag Certificate of Live Birth kag Marriage Certificate para sa mga bag-o kasal;
- Magsuksok sang FACEMASKS kag FULL FACE SHIELD; kag
- Mag-obserba sang PHYSICAL DISTANCING
