Ginpasakaan sang anonymous graft complaint sa Office of the Omdudsman si Health Secretary Ted Herbosa kag duwa pa ka opisyal sang Department of Health.
Ini kaangot sa paggamit sang mga ini sa P98 million nga pondo sang gobyerno para sa isa ka radio program nga nagserbe bilang ila plataporma sa ila personal publicity.
Ang nagareklamo nagpakilala bilang kabahin sang Alliance for Clean and Transparent Government (ACTGov) nga nagpasaka sang administrative complaint batok kanday Herbosa, Assistant Secretary Albert Domingo, kag Director Tina Marasigan.
Suno sa complainant, gin-gamit sang mga opisyal ang radio program para sa kaugalingon nga publicity sa baylo nga para kuntani sa health promotion lamang.
Kabahin man sa reklamo ang alegasyon nga may ara sang conflict of interest, bangud ang asawa ni Director Marasigan ang executive sang kompanya nga nagahatag sang content sa radio station.
Sa bahin naman sang DOH, gin-athag ni ASec. Domingo nga wala pa ang mga ini sang nabaton nga kopya sang reklamo kag suno pa sa iya ang ila anchoring kag hosting ang ginsunod sa patakaran sang gobyerno.
Samtang, pahayag naman ni Herbosa nga legal kag transparent ang paggamit sang media platforms sang DOH kag nagsunod ini sa procurement laws kag media ethics.
