Naga-igod na ang health care system sang Indonesia kasunod sang pagtimbuok sang kaso sang COVID-19.
May mga pasyente nga ginpahamtang na lang sa mga parking areas bangud indi na maakomodar sang mga ospital bangud 90% na nga okupado ang mga hospital beds.
Suno kay Bombo International Correspondent Ginavella Limpin Cumla direkta sa Jakarta, Indonesia, may mga tents na sa gwa sang ospital nga ginpahamtang kag ini ang ginhimo nga emergency rooms para sa mga pasyente.
Mabatian mismo ang masako nga mga huni sang ambulansya nga nagapakadto-pakari sa ospital.
May yara man sang mga apartment nga ginhimo na subong nga quarantine facility para sa mga COVID-19 asymptomatic patients.
Ang pagtimbuok sang kaso ang ginapatihan tuga sang bag-o nga virus strain nga Delta variant nga una na-detect sa India.
Pahayag ni Cumla, 15% sa mga natapikan sang virus subong ang lunsay mga kabataan nga naga-edad 15 anyos panubo.
Sa Meda, ang capital city sang North Sumatra province, naglab-ot na sa 1,800 ka mga kabataan ang na-infect sang virus lakip na ang 14 ka mga napatay.
Malapit 1,000 nga mga Indonesian health workers naman ang napatay bangud sa virus humalin sang nag-umpisa ang pandemya sa diin 401 sa nasambit nga numero ang lunsay mga doctor kag 14 sa ila ang fully vaccinated.
Subong nga bulan, masobra 300 nga mga vaccinated doctors kag healthcare workers sa Cental Java ang natukiban nga na-infect man sang COVID-19.
Dugang pa ni Cumla, sa 270 million nga populasyon sang Indonesia, 5% pa lang ang nakabaton sang kumpleto nga bakuna batuk sa coronavirus.
