Nagdangop sa Bombo Radyo Iloilo ang pila ka contractual medical frontliners sa Iloilo Province nga gin-hire sang Hunyo 16 sang sini nga tuig sa isa ka wala ginhingadlan nga ospital, apang ginapahayag nga tubtob subong, wala sila sa gihapon mahatagan sang sweldo.
Sa interview sang Bombo Radyo kay alyas Shane, nagatrabaho bilang nursing attendant sa isa ka ospital sa probinsya sang Iloilo, iya ginpahayag nga sa walo sa ila nga medical workers nga ginalakipan sang duha ka medical doctors, duha ka nurses, duha ka nursing attendants, isa ka X-Ray Technician kag isa ka Medical Technologist, pila pa lang ang nakabaton sang sweldo para sa bulan sang Hunyo kag kadam-an ang wala gid may nabaton tubtob subong.
Gin-athag niya nga ang Department of Health (DOH) ang nag-hire sa ila kag ang ahensya man ang nagapa-sweldo sa ila.
Apang suno kay Shane, tuman ang ila ka-dismaya sang nagpakig-angot sila sa DOH bangud ginapahayag nagpasalig sa ila ang isa ka personnel sang ahensya nga releasan sila sang sweldo sa tion nga indi na ang mga ini masako sa trabaho.
Pahayag niya, kuntani maluoy man ang ahensya sa ila bangud naga-risgo sila sang kabuhi sa pag-trabaho apang lubog pa sila sa utang bangud sa tuman ka-delay nga pag-release sang ila ginpangabudlayan nga sweldo.
