Wala pa nakabton sang Special Risk Allowance (SRA) ang 36 ka newly hired health workers nga gin-assign sang Iloilo Provincial Government sa Western Visayas Medical Center (WVMC).
Nahibaluan nga santo sa ginpirmahan nga kontrata sang health workers, ginapahayag nga ‘no work, no pay’ man sila kun magpositibo sa COVID-19.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga sini nga bulan sang Hunyo lang nag-umpisa sa trabaho ang contractual health workers sa WVMC.
Padayon man nga ginapatsikyar sa Hospital Management Office (HMO) ang mga dokumento sang nasambit nga health workers agud ma proseso ang ila SRA.
Apang suno kay Mamon, nakabaton na sang ila nga sweldo ang 36 ka health workers sa diin nagahimo man sang dugang nga tikang ang probinsya agud nga maka-request sang supplemental budget.
Katuyuan sini nga mahatagan sang hazard pay nga P300.000 per day ang tanan nga health workers sa probinsya magluwas sa ila ginapaabot nga SRA.
Nagpasalig man ang natungdan nga padayon ang ila pag-facilitate sa WVMC kag DOH agud nga ma-proseso ang pondo sang SRA sang 36 ka health workers.
Una na gin-athag sang DOH Region VI nga eligible nga makabaton sang SRA ang health care workers nga ‘physically’ naga-report sa trabaho kag direkta ukon in-contact sa pag-atipan sa COVID-19 patients sa public hospitals, laboratories, medical kag quarantine facilities lakip na sa DOH-certified private hospitals
