“Halungi man ninyo ang mga nurse kag mga frontliners kay amo na ang gaatubang sa COVID patients naton kag sa mga gina-quarantine.”
Kabahin ini sang apelar sang isa ka nurse sa Iloilo City Government matapos 7 ka bulan na nga wala nakabaton sang special risk allowance ukon SRA apisar naga-duty siya sa isa ka quarantine facility sa syudad.
Sa interview sang Bombo Radyo sa isa ka nurse nga nagpahinago lang sang pangalan, iya ginpahayag nga Septyembre 2020 siya nagsulod sa trabaho bilang health worker sa idalom sang city government.
Septyembre tubtub Disyembre, nakabaton pa siya sang SRA. Apang pagsulod sang Enero tubtub subong nga bulan, wala na sang SRA ukon benefit nga nahatag sa iya kag sa iya nga mga kaupod.
Suno sa nurse, nag-text siya sa isa ka admin officer sang City Health Office (CHO) agud mangayo sang update apang ang reply: ‘Waay pa.’
Suno pa sa natungdan, may message subong nga naga-circulate nga nagapahayag nga kinahanglan nila nga magpasa sang December to April nga Daily Time Record (DTR). Apang suno sa natungdan, Abril pa lang, naka-submit na sila sini nga requirement.
Ginpahayag pa sang nurse nga nakapamangkot man siya sa DOH Region VI sang Agusto 3 kag ang reply, ‘wala pa naka-submit ang Iloilo CHO sang Memorandum of Agreement (MOA).’
Sang gin-check sang Bombo Radyo sa CHO, ginpahayag sang staff nga ‘kumpleto na ang requirements’.
Sang gin-check sang Bombo Radyo sa DOH Region VI, ginsabat nga nakumpleto na gid man sang city government ang papeles sang ‘first week sang August’.
Nagalibog ang ulo sang natungdan kun ano ang plano sang city government. “Kun mamangkot ako sa city health office, waay pa update. Ano nga waay update? Wala gahulag? Ano ang kulang? Diin na dapit ang amon nga papeles? Amo na nga gabalaka man kami.”
INDI NAGAISAHANON NGA KASO
Ginaduso na subong sa Kamara nga ipatigayon ang imbestigasyon angot sa release sang SRA sa health workers sa bug-os nga pungsod.
Ang ginaduso nga imbestigasyon ang maga-cover sang ₱9 billion fund sa SRA nga gin-release sang Budget Department sang nagligad nga Hunyo sa health workers nga nagatatap sa COVID-19 patients.
Ginpahayag sa resolution nga indi lang delayed ang release kundi ‘kulang pa ang actual amounts’ nga nabaton sang iban.
Una na nga ginpahayag sang DBM nga makabaton sang SRA nga indi magsobra sa ₱5,000 per month ang health worker. Ang pondo ang na-release na sa bahin sang DOH.
