ILOILO CITY – Magapadayon ang hearing para sa writ of possession nga ginpasaka sang MORE Electric and Power Corporation agud nga makuha ang tanan nga asset sang Panay Electric Company (PECO).
Ini matapos nga wala ginpaboran ni Pairing Judge Victor Gelvezon ang motion sang MORE Power nga indi na lang pagpadayunon ang hearing sa Hulyo 2 kag sa baylo, gilayon nga pagadesisyunan ang writ of possession.
Sa interview sang Bombo Radyo kay Atty. Estrella Elamparo, legal counsel sang PECO, iya ginpahayag nga indi sila magpasugot nga gilayon nga magdesisyon si Judge Gelvezon tuhoy sa writ of possession.
Ini bangud nga suno kay Atty. Elamparo, kinahanglan pa nga ipasa sang MORE Power ang kumpleto nga dokumento nga ginahingyo sang hukom.
Ang mga dukomento nga gamiton nga ebidensya sa hearing ang kinahanglan pa nga ipaidalom sa certification suno kay Atty. Elamparo.
Sa ila bahin sa PECO, ginpahayag ni Atty. Elamparo nga luyag nila nga mahatagan sang kahigayunan nga makasabat.
Ginpahayag man sang natungdan nga magatambong sa hearing sa Hulyo 2 ang mga tiglawas sang PECO kag ila himuon ang tanan nga masarangan agud nga indi makuha sang MORE Power ang tanan nga asset agud mangin bag-o nga power distributor sa syudad sang Iloilo.
