ILOILO CITY – Napun-an sang tensyon ang ginpatigayon nga hearing tuhoy sa Writ of Possession sang MORE Electric and Power Corporation agud nga makuha ang assets sang Panay Electric Company (PECO).
Sa ginpatigayon nga hearing sa Iloilo Hall of Justice Branch 37 subong nga adlaw, masobra sa 40 ka minutos nga nagbaisay sanday Hon. Judge Victor Gelveson kag ang legal counsel sang PECO nga si Atty. Estrella Elmaparo.
Sa pagpaathag ni Atty. Hector Teodosio, legal counsel sang MORE Power, iya ginpahayag nga makapila ka beses nga ginsaway ni Judge Gelveson si Atty. Elamparo.
Ini bangud nga suno kay Atty. Teodosio, ginduso sang kampo sang PECO nga isaylo sa Muntinlupa ang venue sang hearing kag ginadumili-an si Judge Gelveson nga mag-uyat sang kaso bangud nga indi makahatag sang maayo nga desisyon ang hukom tuhoy sa isyu sang electric power provider sa syudad sang Iloilo bangud sa impluwensya sang Mass Media.
Sa pihak sini, wala ginpaboran sang hukom ang nasambit nga hingyo sang PECO bangud sa pila ka technicalities.
Ginpahayag man ni Atty. Teodosio nga ang gag order nga una na nga ginhingyo sang PECO ang ila nga gin-withdraw.
Katuyu-an sang nasambit nga gag order amo nga dumili-an ang mga anay empleyado sang PECO nga magserbe nga testigo sa kaso.
Ginhatagan man sang 10 ka adlaw ang MORE POWER nga makapasa sang updated nga assessment sang sa tanan nga asset sang PECO.
Bangud sini suno kay Atty. Teodosio, luyag niya nga magpasaka sang opposition tuhoy sa luyag sang PECO nga isaylo sa Muntinlupa ang venue sang hearing.
Ang masunod nga hearing tuhoy sa Writ of Possession suno sa natungdan ang patigayunon sa Hunyo 2.
Nagpamalibad naman ang PECO nga maghatag sang pahayag tuhoy diri bangud nga suno sa ila, indi nila luyag nga malapas ang sub judice rule.
