ILOILO CITY – Magapadayon sa gihapon ang hearing tuhoy sa writ of possession nga ginpasaka sang MORE Electric and Power Corporation agud nga kuhaon ang mga asset sang Panay Electric Company (PECO).
Ini ang kasunod sang pagpaguwa sang apat ka pahina nga desisyon ni Presiding Judge Yvette Go sang RTC Branch 37, sa diin nakasaad nga magapadayon ang hearing sa writ of posession nga ginpasaka sang MORE power kag wala niya ginpaboran ang Motion for Reconsideration nga ginpasaka sang PECO.
Santo desisyon ni Judge Go nga napetsahan Mayo 24, indi mahimo nga ipauntat ang hearing bangud nga ang elektrisidad ang makabig nga public interest sa diin madamu ang mahalitan kun may matabo nga power interruption sa bug-os nga syudad sang Iloilo.
Ginpahayag ni Go nga ang pairing judge na ang magapadayon sang hearing bangud nga isa siya ka bulan nga naka on-leave.
May kaangtanan diri, wala naman nagakadulaan sang paglaum ang PECO matapos ang nangin desisyon ni Judge Go.
Sa interview sang Bombo Radyo kay Marcelo Cacho, administrative manager sang PECO, iya ginpahayag nga nabaton na nila ang kopya sang desisyon sang RTC Branch 37.
Ginpahayag ni Cacho nga matuod nga ginbasura sang korte ang ila ginpasaka nga Motion for Reconsideration apang madugayan pa suno sa iya bag-o makuha sang MORE power ang ila mga asset.
Ini bangud nga suno kay Cacho, buhi pa sa gihapon ang ila nga ginpasaka nga Motion to Suspend Proceeding nga kinahanglan pa nga desisyunan sang pairing judge.
Magluwas diri, ginpahayag ni Cacho nga madugay pa ang manginaway sa tunga sang duha ka electric company bangud nga may yara pa sang 2-year provisional permit ang PECO agud nga makapadayon sa pag-operate gamit ang Certificate of Public Convinience and Necessity (CPCN).
Samtang, suno naman kay Jonathan Cabrera, tagpamaba sang MORE power, ang nasambit nga desisyon ang bunga sang pagtuon ni Judge Go saginplastar nga argumento sang duha ka electric company.
Ginpahayag ni Cabrera nga nagmadinalag-on ang argumento sang MORE power bangud nga ginbasura ni Judge Go ang Motion for Reconsideration nga ginpasaka sang PECO.
Bangud sini suno kay Cabrera, wala na sang may makapugong sa pagpadayon sang hearing sang writ of possession agud nga pormal na nga makuha sang MORE power ang asset sang PECO.
Kasubong suno kay Cabrera nga ‘delaying tactics’ kag ginapatalang sang PECO ang publiko paagi sa ila sala nga panindugan.
Yari ang reaksyon ni Cacho sa nangin desisyon ni Judge Go:
Samtang, yari naman ang pahayag ni Cabrera:
