Ginkumpirma sang medical examiner sa Florida, Estados Unidos sang Amerika nga heart attack ang ginkamatay sang wrestling legend nga si Hulk Hogan.
Sang nagligad nga semana sang nasapwan ang 71-anyos nga si Hogan ukon si Terry Bollea sa matuod nga pangalan nga wala na sang kabuhi sa sulod sang iya puluy-an sa amo nga estado.
Antes pa man ang iya kamatayon, nakasuprer pa ini sang leukemia kag atrial fibrillation kag irregular heart rhythm.
Bilang pagdumdom sa “Hulkster,” gin-anunsyo naman ni Florida Governor Ron DeSantis nga iga-half-staff ang flags sa tanan nga official buildings subong nga Byernes nga gindeklarar man nga “Hulk Hogan Day in Florida.”
Si Hogan amo ang ginakilala nga “biggest wrestling star of all time” nga nangin bantog sang dekada-80 kag dekada-90 kag mas nangin kilala pa sa iya pagsulod sa karera sang pag-arte.
Nakahimo man siya sang record bilang six-time World Wrestling Entertainment (WWE) Champion kag duha ka beses nga nabutang sa WWE Hall of Fame nga natabo sang 2005 kag sang 2020 bilang parte na sang New World Order.
