Patay ang isa ka babaye nga piloto matapos nagtibusok ang isa ka helicopter sa Barangay San Miguel, Guimba, Nueva Ecija.
Ginkilala ang biktima nga si Julia Flori Monzon Po, 25, residente sang Parañaque City kag isahanon nga sakay sa helicopter sang natabo ang crash.
Base sa reports, si Po amo ang piloto sang artista kag host nga si Willie Revillame.
Gin-alegar nga halin sa Baguio City ang helicopter nga may body number nga RPC-3424 kag pakadto sa Metro Manila sang natabo ang aksidente.
Pasado alas syete kagab-i, ginpatigayon ang salvage operation agud nga makuha ang helicopter halin sa creek nga may tubig nga tubtub sa dughan sang tawo ang kataason.
Ginkumpirma naman sang Civil Aviation Authority of the Philippines (CAAP) ang insidente kag nagpahayag nga maga-imbestigar ang Aircraft Accident Investigation and Inquiry Board kaangot sa rason sang pag-crash sini.
Gin-report nga nakabaton ang Philippine Aeronautical Rescue Coordination Center (PARCC) sang multiple emergency alerts antes ang nasambit nga insidente.
