Nagsaka na sa 24 ang numero sang nagkalamatay bangud sa pagkasunog sang kagulangan sa southeastern region sang South Korea.
Lakip sa kumpirmado nga napatay amo ang piloto sang helicopter nga nagtibusok samtang naga-responde man sa lapnagon nga sunog.
Gina-deploy sang gobyerno ang amo nga fire-fighting helicopters agud mapatay ang forest fires bangud delikado ang lugar, mataas, kag may mga pil-as.
Madasig ang paglapta sang kalayo nga nagpwersa man sang ginabanta 27,000 ka mga tawo nga magbiya anay sa ila nga mga balay. Nadalahig man ang mga puluy-an bangud sa mabaskog nga hangin, ginsirado ang mga eskwelahan, kag ginpangsaylo man ang ginatos ka mga preso halin sa apektado nga mga jail facilities.
Suno kay Acting President Han Duck-soo, indi pa gid maayo ang sitwasyon apisar nga na-deploy na ang tanan nga available nga personnel kag equipment pati na ang US military nga naka-base sa Korea.
Sa 24 nga napatay, una na nga ginpahayag sang Safety Ministry nga 14 ang halin sa Uiseong county, samtang apat naman ang konektado sa Sancheong county. Kadam-an sa mga napatay ang naga-edad sang 60-70 anyos.
Antes sini nga insidente, nauna naman nga ginkumpirma nga may technical issues sa 48 Russian helicopters sang Korea Forest Service.
Walo ang wala na naga-operate halin sang nagligad nga tuig bangud sa sanctions nga naangot sa Ukraine war; buot silingon, indi maka-import ang South Korea sang kinahanglanon nila nga mga parte sang aircraft.
Sa latest nga insidente, may nabatian pa ang mga residente nga indi kinaandan nga gahod halin sa helicopter antes ini nagtibusok sa duta kag nagsigabong nga ginkamatay sang piloto.
Masobra na 10,000 nga mga bumbero ang napadala sa apat ka separado nga mga lugar as of Wednesday lakip na ang ginatos ka pulis kag military units samtang 87 naman ka helicopters ang ginagamit suno pa sa record sang Safety Ministry.
