ILOILO CITY – Dead on arrival sa hospital ang isa ka helper matapos ginluthang sang wala pa makilala nga suspek sa Brgy. Arguelles, Jaro, Iloilo City.
Ang biktima amo si Michael Suarez, 39 anyos, pamilyado kag residente sang San Roque sa distrito sang Jaro.
Sa interview sang Bombo Radyo kay Pinky Jolabar, live-in partner sang biktima, iya ginpahayag nga si Suarez ang nagabulig lamang sa pagbaligya sang pagkaon sa Jaro Plaza.
Suno kay Jolabar, wala siya sang ihibalo kun nga-a brutal ang pagpatay sa iya live-in partner nga naka-angkon sang multiple gunshot wounds.
Ginpahayag ni Jolabar nga sadto, drug surrenderee ang iya live-in partner apang sa subong, nagabulig sa pagbaligya sang pagkaon sa Jaro Plaza ang biktima agud nga may isagod sa apat nila ka anak.
Sa pagkamatuod suno sa natungdan, antes pa man natabo ang insidente, ginpadulungan pa niya ang live-in partner sa Jaro Plaza agud idul-ong ang inugbaligya nga lumpia.
Antes magpauli, nagpahayag pa ang biktima nga magpauli sang temprano.
Nahibalu-an nga nagamaneho sang tricycle ang biktima sang ginluthang sang wala pa makilala nga suspek.
Ginabanta 10 ka basiyo sang indi pa matumod nga kalibre sang armas-luthang ang nakita sa crime scene.
