Ginkumpirma sang Department of Justice (DOJ) nga ginbalik ni dismissed Bulacan district engineer Henry Alcantara ang masobra sa P110 million nga cash sa gobyerno.
Ini ang kabahin sang restitution process kaangot sa nagapadayon nga imbestigasyon sa flood control corruption scandal.
Sa ginsapubliko nga videos kag pictures, makit-an nga yara man ang presensya sang mga tiglawas sang Bureau of Treasury kag Land Bank of the Philippines.
Suno kay Justice Acting Secretary Fred Vida, magapaidalom ini sa bank verification antes ini ipasa sa Treasury.
Natabo ang restitution binulan matapos gin-relieve si Alcantara sa pwesto kag sang ulihi gin-dismiss sang Department of Public Works and Highways (DPWH).
Napamatud-an ini nga guilty sa serious administrative charges lakip na ang grave misconduct, gross neglect, kag conduct prejudicial to the best interest of the service ilabi na sa iya papel sa “ghost” kag substandard flood control projects sa probinsya sang Bulacan.#
