ILOILO CITY – Gin-relieve na sa puwesto ang hepe sang Balsan Police Station kag walo pa sini ka mga tinawo may kaangtanan sa buy bust operation sa Barangay Camambugan sa nasambit nga banwa kun sa diin nadakpan ang anay drug surrenderer nga si Kenneth Tiope nga sa karon nagbalik sa pagbaligya sang iligal nga droga.
Sa interview sang Bombo Radyo Iloilo kay Chief Insp. Aron Palomo, spokesperson sang Iloilo Provincial Police Office (IPPO), ginpahayag sini nga kahapon ginapaguwa ang relieve order batok kay S/Insp. Jerry Leones kag walo pa ka katapo sang Balasan PNP.
Ini angot sa imbestigasyon nga ginapatigayon batok sa Balasan PNP bangud sa ginapahayag pagpamalibad sang mga ini nga magkooperar sa buy bust operation sang Provincial Drug Enforcement Unit 3 sa pagpamuno ni Chief Insp. Charlie Sustento.
Nahibaluan nga nagpamalibad ang Balasan PNP nga presuhon si Tiope matapos nga nadakpan, samtang gin-ako naman sang drug personality nga abyan sini ang mga pulis sa Balasan kag masami pa siya nga ginahagad maghampang sang basketball.
Ang gin-relieve nga mga pulis ang ginalakipan nanday PO3 Reynaldo Garcia, PO2 Wincer John Tives, SPO3 Marcelino Labus, PO3 Guatche, PO2 Jugie Mianie, PO3 Dato, PO2 Marlon Fuentes kag PO3 Lemuel Mosqueda.
Epektibo subong adlaw, magapungko bilang hepe sang Balasan police si S/Insp. Orlando Panela.