ILOILO CITY– Isa na ka pulis nagikan sa Negros Police Provincial Office ang nasampulan kag ginrelieve ni Police Brigadier General Rene Pamuspusan bangud sa kapaslawan nga magsunod sa direktiba sang Philippine National Police.
Sa interview sang Bombo Radyo kay PRO 6 director Pol. Brig. Gen. Rene Pamuspusan, iya ginpahayag nga wala nakahatag sang paathag si Murcia Chief of Police , Police Major Roberto Injape Jr, tuhoy sa drug situation sa ila banwa kag wala man sang ginpresenta nga diagram sang mga drug personality.
Suno kay Pamuspusan, isa sa mga mando nagikan sa OIC PNP chief amo ang away kontra sa iligal nga droga sa diin, ginahatagan sang importansya ang mga high value target.
Magluwas diri suno sa iya, naabtan man niya nga indi organisado ang police station sang banwa sang Murcia.
Nagalaum man ang natungdan nga magaserbe ini nga leksyon ukon warning sa tanan nga mga chiefs of police sa probinsya, nga magsunod sa kun ano ang ginahatag nga direktiba sa ila.
