Nagpaathag ang hepe sang Iloilo City Police Station 2 kaangot sa mga alegasyon sa ila ginpatigayon nga anti-illegal gambling operation sa Brgy. Luna, La Paz, Iloilo City.
Sa interview sang Bombo Radyo kay Police Captain Marlon Perez, hepe sang Iloilo City Police Station 2, iya ginpahayag nga sa pito ka indibidwal nga ila naaresto matapos nga naaktohan nga nagahampang sang poker, ginklaro sini nga ang isa diri nga engineer ang nag-upod lang sa iya abyan bangud may ginabatyag ini nga sakit.
Suno kay Perez, sa pito ka mga indibidwal, anom sa ila ang napasakaan na sang kaso nga paglapas man sa Republic Act (RA) 9287.
Gin-athag man sang natungdan nga ang engineer ang nadalahig lamang kag nagsala ang ila nga imbestigador sa pag-usisa sa amo nga kaso.
Rason nga gin-erase ang ngalan sang engineer sa listahan nga pagasakaan sang kaso.
Nagpanindugan man ini nga P111,000 lang ang tanan nga recoveries nga na-declare sa blotter report, baliskad sa impormasyon nga minilyon ang kabug-usan nga recoveries.
Ginpatpat man ni Perez nga ang iban nga chip ang nalakip lang kag wala na-include sa amo nga hampang, rason nga indi maglab-ot sa minilyon ang recoveries.
