ILOILO- Desidido nga magpasaka sang kaso ang hepe sang Malay Police Station,Aklan nga si Pol Major Jess Baylon batok sa iya paryente nga nagmaoy kag nanghalit rason nga iya ini ginluthang.
Nahibaluan nga natabo ang pagpangluthang sang pulis sa pakaisa sang iya asawa sa birthday party sang ila anak sa Barangay Tinio-an, Cabatuan, Iloilo.
Sa interview sang Bombo Radyo kay Police Chief Master Sergeant Vito Bastiero, OIC chief sang Cabatuan Municipal Police Station, iya ginpahayag nga santo sa imbestigasyon, samtang nagapatigayon sang selebrasyon sa balay ni Baylon, may nagluntad nga kinagamo sa tunga sang biktima nga si Dennis Baylen, 27 anyos,kag tiyo nga si Lamberto Baylen.
Suno kay Bastiero, nagsulod ang tiyo sa balay ni Major Baylon agud nga magpangayo sang bulig para sawayon ang nagawaras nga biktima.
Ginpahayag nga ginsarado ni Baylon ang ila nga gate, apang pwersahan nga ginbuksan ini sang biktima kag nagpanghaboy sang bato kun sa diin aksidente nga naigo ang misis ni Baylon kag nalipong.
Bangud sini, napilitan si Major Baylon nga tiruhon ang biktima sa tiil.
Insigida nga gindala sa ospital ang biktima kag matapos nga mabulong, gin-refer man sa out-patient department.
Ginapahayag nga apat tubtob lima ka lupok sang pusil ang nabatian sa lugar.
Matapos ang insidente, nagsurender man si Major Baylon sa kapulisan.
Plano ni Baylon nga pasakaan sang kaso nga trespassing, physical injury, direct assault kag attempted homicide ang biktima nga natiruhan.
Ginkumpirma naman ni Bastiero nga nagapaidalom sa rehabilitation si Baylen sa Pototan Rehabilitation Center.
Nagapabilin sa subong nga arestado si Baylon samtang preso man sa custodial facility sang Cabatuan Municipal Police Station si Baylen.
