PAVIA, ILOILO – May paathag ang hepe sang Pavia Municipal Police Station kun nga-a wala siya sang nagpatigayon sang inspection si Iloilo Police Provincial Office Director Roland Vilela, kadungan sang ginpatigayon nga nationwide transport strike.
Sa interview sang Bombo Radyo kay Police Major Niño Leonard Amar, hepe sang Pavia Municipal Police Station, iya ginpahayag nga sang nagligad nga Setyembre 30, nagpadulong siya sa Tapaz, Capiz para sa on-site inspection sa modernized operation center.
Suno kay Amar, natabu-an lang nga nagdungan ang strike kag ang on-site inspection nga lunsay man may kaangtanan sa iya trabaho.
Sa pagkamatuod suno kay Amar, madugay na nga naka-schedule ang on-site inspection sa modernized operation center sa diin mahimo man nila ini nga mapatukod sa Pavia, Iloilo.
Ginpahayag ni Amar nga wala man kun tani sang problema sang nagpatigayon sang inspection si Vilela apang nakita mismo sang Iloilo Police Provincial Office Director nga wala sa ila designated post ang 15 ka mga pulis.
Ginpahayag sang hepe nga sa Pavia Municipal Police Station, 36 ang kabug-usan nga police personnel sa diin lima ang naka on-leave.
Nahibalu-an nga sang Setyembre 30, naka full alert status ang bug-os nga hanay sang Philippine National Police sa diin ginadumili-an ang pag-absent ukon pag-leave sang mga pulis magluwas lang sa mga nagamasakit.
Magluwas sa 16 ka pulis sa Pavia, nalakip man sa ginapasabat ni Vilela ang 11 ka pulis sa San Miguel Municipal Police Station, siyam sa Maasin Municipal Police Station, siyam sa Cabatuan Municipal Police Station kag lima sa Oton Municipal Police Station.
