Nalakip ang hepe sang Digos City Police sa Davao del Sur sa mga person of interest kaangot sa pagpatay sa isa ka barangay captain samtang naka-livestream ini ukon Facebook live.
Suno sa Police Regional Office 11 (PRO11), gin-relieve na sa iya puwesto si Digos City Police Station acting chief Police Lieutenant Colonel Peter Glenn Ipong samtang ginatutukan ang imbestigasyon bahin sa kamatayon ni Barangay Tres de Mayo captain Oscar “Dodong” Bucol Jr.
Ginsiling sang PRO11 nga ang director nga si Police Brigadier General Leon Victor Rosete amo ang nagmandu nga pahalinon si Ipong sa puwesto agud masiguro nga patas ang pag-imbestigar.
Base sa impormasyon, namensyonar nga isa sa mga nakontra ni Bucol sa iya pag-livestream amo si Ipong.
Gindugang pa sa report nga may 20 ka pulis ang ginpaidalom na sa paraffin test.
Naghingyo man ang pamilya sang biktima nga ang National Bureau of Investigation (NBI) ang magpatigayon sang imbestigasyon sa krimen.
Ginausisa man ang CCTV footage nga nakakuha sang salakyan nga ginasuspetsahan nga gingamit sang mga suspek sa pagluthang kay Bucol.
Nahibaluan nga may yara sang P2 milyon nga padya nga halin kay Vice President Sara Duterte kag Governor Yvonne Cagas para sa pagdakop sang mga suspek.
“He [Police Brigadier General Leon Victor Rosete] further directed the Davao del Sur Provincial Police Office, under the leadership of Police Colonel Leo T. Ajero, Provincial Director, to conduct a thorough and comprehensive probe, which may take one to six months depending on the complexity of the case,” suno sa statement sang PRO 11.#
