Lima ka mga boksidor ang magatiglawas sang Pilipinas sa Paris Olympics matapos nakahingabot pa kag nakakuha sang ticket ang Igorot boxer nga si Hergie Bacyadan.
Nakuha sini ang isa sa apat ka Olympic spots sa women’s 75kg sa ikaduha nga World Qualification Tournament sa Bangkok, Thailand kahapon, Hunyo 2, sang ginlutos sini si Maryelis Yriza sang Venezuela sa quarterfinals.
Gintumba sini ang Venezuelan fighter sa ikaduha nga round kag nakuha ang 5-0 nga kadalag-an sa amo nga sambuwa nga amo ang ikatatlo nga tion nga iya pagsaka sa ring sa sini nga tournament.
Kilala si Bacyadan nga labing-una nga Vovinam World Championships gold medalist sang Pilipinas antes ini nagsulod sa boksing.
Updan sini ang apat ka iban pa nga Filipino boxers sa Summer Games nga amo sanday Tokyo silver medalist Carlo Paalam nga nag-qualify sang Sabado sang gab-i; Tokyo silver medalist Nesthy Petecio, Tokyo bronze medalist Eumir Marcial, kag debutante nga si Aira Villegas.
Ini amo ang pinakadaku nga boxing delegation sang Pilipinas sa Olympics halin sang nagpadala man ini sang lima ka boksidor sa 1996 Atlanta Games.
