Nagpakitaay sang mabaskog nga pwersa ang Israel kag Lebanese militant group nga Hezbollah paagi sa pagpalupad sang drones, rockets kag jets apang gin-untat man gilayon kag wala gindayon ang ginakahangaw-an nga all-out war nga amo pa ang magapasingki sang tensyon sa Middle East.
Ginhimo ini nga cross-border attacks kadungan man sang pag-istoryahanay sang mediators, Israelis, kag Hamas representatives sa Egypt agud kuntani mapatigayon ang ceasefire sa Gaza kag mapahagan-hagan ang gamo sa rehiyon.
Suno sa Hezbollah, naggamit sila sang drones kag masobra 320 ka rockets batok sa 11 ka Israeli military sites bilang una nga hugnat sang ila pagtimalos kasunod sang Israeli airstrike nga nag-resulta sa kamatayon sang ila commander nga si Fuad Shukr sang nagligad nga bulan.
Nagpaandam ini nga may ikaduha pa nga hugnat sang atake.
Sa una nga atake, isa ka Israeli navy officer ang napatay kag duha ka iban nga service members ang nasamaran, kag naigu man ang military intelligence site sang Israel malapit sa Tel Aviv.
Sa airstrikes naman sang Israel, duha ka Hezbollah fighters kag isa ka militante halin sa ila kaalyado nga grupo ang napatay. Sunod nga ginklaro ni Prime Minister Benjamin Netanyahu nga wala sila sang tuyo nga magpatigayon sang full-scale war apang determinado sila nga magdepensa pananglitan may maghalit sa ila.
Ginkumpirma man ni Netanyahu ang impormasyon nga mas nauna ang air strikes sang Israel ipaanggid sa barrage sang Hezbollah. Isa ini ka “preemptive” strike suno sa prime minister kag amo ang nakapugong sa mas daku kuntani nga pwersa nga ipadala sang militante nga grupo.
Kadungan sini nga tensyon, ginsuspinde sang masobra isa ka oras ang operasyon sa airport sa Tel Aviv amo man ang byahe halin kag pakadto sa Beirut sa Labanon.
Gin-athag man sang Estados Unidos nga indi sila involved sa airstrikes sang Israel, apang nag-ako nga nakahatag sila sang intelligence kaangot sa himuon nga atake sang Hezbollah.
