Nagsabat ang militante nga grupo nga Hezbollah nga handa sila pananglitan dayunon sang Israel ang ground offensive ukon ground assault sa Lebanon.
Suno pa sa deputy leader nga si Naim Qassem, posible pa nga maglawig ang ila away.
“We will face any scenario and we are ready if Israel decides to enter by land, the resistance forces are ready for any ground confrontation,” pahayag sini sa Al-Manar television channel sang grupo. “We know the battle may be long.”
Ginsiling man sini nga magapili sila sang bag-o nga lider kasunod sang pagpatay sang Israel kay Hassan Nasrallah nga isa sa founding members sang Hezbollah nga nagpamuno sa amo nga grupo sa Middle East sa masobra tatlo ka dekada.
Pahayag ini Qassem, padayon sila nga magaaway batok sa Israel bilang kabahin sang ila nga suporta sa Gaza kag sa Palestine kag bilang kabahin sang proteksyon sa mga taga-Lebanon.
Baliskad ini sa panindugan sang Israel Defense Forces nga ang Hezbollah amo ang nagabutang sa mga Lebanese sa risgo kag amo ang nagapamatay sa mga inosente nga sibilyan.
Sa nagligad nga 24 ka oras, nahibaluan nga may 136 ka panibag-o nga napatay sa Lebanon bangud sa airstrikes sang Israel.
Ginpasirado naman sang Israel pati ang tatlo ka border towns — gintawag ini nga closed military zones — kag ginalantaw nga signos nga mas malapit na ang ila himuon nga ground assault agud mapapas ang Hezbollah.
