Isa na naman ka high-ranking official sang Hezbollah ang ginpatay sang Israel pagkatapos nga ginkumpirma nga napatay man ang ila long-time leader nga si Hassan Nasrallah.
Suno sa Israel Defense Forces (IDF), ang latest nga napatay sa airstrike amo si Nabil Kaouk nga deputy head sang Central County sang Hezbollah.
Si Kaouk ang isa ka beterano nga miyembro sang militant group halin pa sang 1980s kag naka-serbe pa anay bilang military commander sang amo nga grupo sa southern Lebanon sang nag-gyera sila kag ang Israel sang 2006.
Ikapito na siya nga Hezbollah leader nga napatay sa atake sang Israel sa sulod lamang sang halos isa ka semana.
Ang ila kamatayon ilabi na ang kay Nasrallah nga dominant political figure sa Middle East ang ginalantaw nga magapasangkad pa sang away sa rehiyon.
Kaangot diri, apat man ang patay kag 45 ang nasamaran sang ginpang-igu man sang Israel ang power station sa Hodeidah, Yemen.
Gina-claim sang Israel nga ini nga power plant kag ang seaport sa Ras Issa ang ginagamit sang Houthis.
Ang Houthi rebel group kaangay man sa Hezbollah kag Hamas nga mga proxy groups sang Iran kag palareho nga mga kaaway sang Israel.#
