ILOILO CITY – Daw ‘nagapanaguay’ lang ang mga opisyal sang Iloilo City Government kag mga vendors bangud sa padayon nga pagbalik sang mga obstruction sa dalanon sa syudad apisar sang wala man nagauntat nga clearing operations.
Ini ang pahayag ni Anti-Squatting and Illegal Structures Unit (ASISU) Head Love Joy Hosenilla bangud sa ila pagbalik-balik sang saway sa mga manugbaligya ilabi na sa city proper.
Sa interview sang Bombo Radyo kay Hosenilla, iya ginpahayag nga pati ang pila ka mga opisyal sang mga kabaranggayan sa syudad ang wala man nagakooperar sa mandu.
Pahayag sang natungdan, talalupangdon ang pagbalik sang mga obstruction kaangay sang stalls sa Iloilo Provincial Capitol kag sa downtown area.
Suno kay Hosenilla, wala sang gin-isyu nga nagakaigu nga permit sa mga manugbaligya.
Ang mga manugbaligya sa Iloilo Terminal Market gid lamang ang ginpahanugutan suno kay Hosenilla, sa diin may ara sila sang 6pm tubtob 6am agreement.
Ginpasalig man sang opisyal nga padayon ang ila paglibot sa mga distrito sa syudad agud hugton pa ang implementasyon sang clearing operations.
